Bugun Qozog‘istonning Olmaota shahrida BRAUIC 2025: “Global ufqlar: transformatsiyalar davrida arxitektura va qurilish sohalarida xalqaro ta’lim hamkorligi” xalqaro forumining 2-kuni yakuniga yetdi.

BRAUIC (Belt and Road Architectural University International Consortium) – 2017-yilda Pekin qurilish va arxitektura universiteti (BUCEA) tashabbusi bilan “Bir makon — bir yo‘l” tashabbusi doirasida tashkil etilgan xalqaro konsorsium bo‘lib, bugungi kunda Osiyo, Yevropa, Afrika va Amerika qit’alaridagi 39 ta mamlakatdan 91 ta universitetni birlashtiradi.

Mazkur forumda Mirzo Ulug‘bek nomidagi Samarqand davlat arxitektura-qurilish universiteti rektori Dr. Chidem Turkyilmaz va Yoshlar masalalari va ma'naviy-ma'rifiy ishlar bo'yicha birinchi prorektor Sherzod Uzoqov ishtirok etmoqda.

 2- kunning muhim tashabbuslari:

Luban Global Schoolning rasmiy ochilish marosimi bo'lib o'tdi. Luban Global School – Luban Workshop dasturidan shakllangan xalqaro platforma bo‘lib, u hunarmandchilik merosi, raqamli vositalar va global hamkorlikni texnik hamda arxitektura-qurilish ta’limida uyg‘unlashtirdi. Tashabbus doirasida amaliyot dasturlari, innovatsion laboratoriyalar va qo‘shma ta’lim yo‘nalishlari nazarda tutilgan bo‘lib, ular MDH davlatlari oliy ta’lim muassasalari uchun ham dolzarbdir. SamDAQUda Luban Global School ning O'zbekistondagi filiali tashkil etiladi. 

Shuningdek, arxitektura merosini saqlash va undan foydalanishga mo‘ljallangan global raqamli platforma taqdim etildi. U “raqamli egizaklar”, obyektlar holatini monitoring qilish, 3D/AR-ekspozitsiyalar hamda universitetlar, ilmiy-tadqiqot institutlari, muzeylar, merosni muhofaza qilish organlari, shahar ma’muriyatlari va loyihalash byurolari uchun xalqaro hamkorlik vositalarini o‘zida mujassamlashtiradi.