2024-yilning 26-oktabr kuni Mirzo Ulug‘bek nomidagi Samarqand davlat arxitektura-qurilish universiteti delegatsiyasi Xitoy Xalq Respublikasining Jiangsu provinsiyasi, Suzhou shahrida joylashgan Jiangsu Huibo Robotics Technology Co. Ltd kompaniyasiga tashrif buyurdi.
Tashrif davomida robototexnikalar ishlab chiqarish va ular bo‘yicha treninglar o‘tkazish hamda ta’lim muassasalarini laboratoriya jihozlari bilan ta’minlovchi ushbu korxonaning faoliyat yo‘nalishlari va imkoniyatlari bilan yaqindan tanishib chiqildi.
Dastlab, korxonaning rivojlanish tarixi va bugungi kungacha erishgan yutuqlari to‘grisida korxona menejeri Dai Sheng tomonidan ma’lumot berib o‘tildi. So‘ngra korxona hududidagi namoyish xonalari va robotlarni takomillashtirish laboratoriyalari bilan tanishtirib o‘tildi. Korxonada mavjud laboratoriyalar asosan o‘quv yurtlari uchun mo‘ljallangan bo‘lib, talabalarga sanoat korxonalaridagi mavjud ishlab chiqarish jarayonlarini amalda bajarish imkoniyatini yaratilganligidir. Ushbu korxona Xitoyning deyarli barcha texnika oliy ta’lim muassasalari olimlari va ilmiy tadqiqotchilari bilan hamkorlikda faoliyat olib borish bilan birga talabalarning amaliyotlarini ham korxona tasarrufidagi o‘quv-sinov laboratoriyalarida o‘tashlari ham SamDAQU delegatsiyasida katta taassurot qoldirdi.
Shundan so‘ng Jiangsu Huibo Robotics Technology Co. Ltd vitse prezidenti janob Cui Xiao Hui boshchiligidagi korxona rahbariyati bilan uchrashuv tashkil qilindi. Uchrashuvda ikki tomon ham o‘zaro hamkorlikni o‘rnatish orqali Samarqand viloyati va Jiangsu provinsiyasi o‘rtasidagi hamkorlik aloqalarini yanada mustahkamlash davr talabi ekanligini ta’kidlab o‘tdi. Janob Cui Xiao Hui Samarqand davlat arxitektura-qurilish universiteti ushbu korxona bilan hamkorlik aloqalarini yo‘lga qo‘yayotgan O‘zbekistondagi ilk oliy ta’lim muassasasi ekanini va mazkur hamkorlik ikkala tomon uchun ham teng manfaatli bo‘lishidan xursandligini bildirib o‘tdi. Uchrashuv so‘ngida joriy yilning noyabr oyida ushbu korxona rahbariyati delegatsiyasining Samarqandga tashrif etishi va ushbu tashrif davomida universitet laboratoriyalarini moddiy-texnik tomondan mustahkamlash bo‘yicha aniq qadamlarni belgilab olishga kelishildi.
Jiangsu Huibo Robotics Technology Co. Ltd 2001-yilda Xitoy Xalq Respublikasining Harbin texnologiyalar universiteti professor-o‘qituvchilari tomonidan tashkil qilingan bo‘lib hozirgi kunda kompaniya bosh qarorgohi Jiangsu provinsiyasining Suzhou shahrida joylashgan. Ushbu kompaniya aqlli zavodlar, sanoat va ta'lim sohalari uchun integratsiyalashgan yechimlarni taqdim etishga ixtisoslashgan bo‘lib, yuqori darajadagi avtomatlashtirish texnologiyasi orqali korxonalarning rivojlanishini takomillashtirish uchun smart ishlab chiqarish yechimlarini taklif qiladi. Shuningdek, ushbu kompaniya xalqaro standart texnologiya va xizmatlar bilan ta’limning barcha bosqichlari, jumladan, bakalavriat bosqichi talabalari uchun keng qamrovli ta'lim yechimlarini taqdim etib kelmoqda. Huibo Robotics kompaniyasi nafaqat Xitoy Xalq Respublikasida faoliyat yuritadi balki xorijiy mamlakatlarda, jumladan, Malayziya, Tailand va Qirg'izistonda ta’lim markazlari faoliyat yuritib kelmoqda.
